Gemorragik isitma

Gemorragik isitma — tana harorati koʻtarilishi, teri ostiga va ichki aʼzolarga qon quyilishi bilan kechadigan virusli kasalliklar guruhi. Gemorragik nefrozonefrit, Qrim gemorragik isitmasi, Omsk gemorragik isitmasi va boshqa xillari mavjud. Kasallik manbai virusi yumronqoziq, dala sichqoni va boshqa kemiruvchilar boʻlib, ulardan odamga turli yoʻllar bilan (kemiruvchilar tezagi bilan ifloslangan oziq-ovqat, suv orqali, shuningdek kana chaqqanda) yuqishi mumkin. Kasallikning barcha shakllarida qaltirash, isitmalash, bosh ogʻrigʻi, darmon qurishi, terida mayda qon quyilishlar (patexiyalar) kuzatiladi. Umumiy belgilaridan burun, milk qonaydi, ayrim aʼzolar, jumladan buyraklar zararlanadi, shu sababdan belda qattiq ogʻriq, bemorga tinchlik va uyqu buzilishi kuzatiladi. Kasallik yengil kechganida bemor isitmalaydi, lekin qon oqishi va buyrak zararlanishi kuzatilmaydi. Kasallikning hamma xilida ham bemor kasalxonada davolanishi lozim. Davo kasallikning belgilariga qarab tayinlanadi, yurak va buyrak faoliyatini maromiga keltiradigan, qon oqishini toʻxtatadigan va boshqa dori-darmonlar buyuriladi. Gemorragik isitmaning oldini olish uchun kemiruvchilarga qarshi kurashish, oziq-ovqatni jips berk idishda saqlash, kanalarni yoʻqotish kerak. Dezinfeksiya va deratizatsiya ishlari ham olib boriladi.

Adabiyotlar

• OʻzME. Birinchi jild. Toshkent, 2000-yil