Muxtor Xudoyqulov

Muxtor Xudoyqulov (1936-yil, Rishton tumani Jalayer qishlogʻi) — oʻzbek masalchi shoiri, yozuvchisi, publitsisti, tarjimoni va olimi; filologiya fanlari doktori.

Muxtor Xudoyqulov
Tavalludi	Rishton tumani, Jalayer qishlogʻi, Fargʻona viloyati
Kasbi	yozuvchi, masalchi shoir, publitsist, tarjimon, olim
Fuqaroligi	Oʻzbekiston
Taʼlimi	Oʻrta Osiyo davlat universiteti

Hayoti

Muxtor Xudoyqulov 1936-yilda Fargʻona viloyati Rishton tumanining Jalayer qishlogʻida tugʻilgan. 1954-yilda oʻrta maktabni tamomlab, Oʻrta Osiyo davlat universiteti (hozirgi Oʻzbekiston Milliy universiteti) jurnalistika boʻlimiga oʻqishga kirgan va 1959-yilda bitirgan. Soʻng respublika markaziy gazetalari hamda „Mushtum“ jurnali tahririyatlarida ishlagan. 1964-yildan Toshkent davlat universitetining jurnalistika fakultetida talabalarga dars bergan.

1968-yilda „Oʻzbek hajviy jurnalistikasining shakllanishi va rivojlanishida „Mushtum“ jurnalining oʻrni“ mavzusida nomzodlik, 2001-yilda „Oʻzbek hajviy publitsistikasining shakllanish va rivojlanish tamoyillari“ mavzusida doktorlik dissertatsiyasini himoya qilgan.

Ijodi

Ilmiy va oʻquv-uslubiy asarlari:

• „Oʻzbek hajviy publitsistikasi“ (2001)
• „Badiiy publitsistika janrlari“ (2004)
• „Jurnalistikaga kirish“ (2005)
• „Axborot publitsistikasi“ (2008)
• „Jurnalistika va publitsistika“ (2008, 2011)

Tarjimon sifatida qadimgi yunon masalchisi Ezop masallari, xitoy faylasufi Konfutsiy hikmatlari, J. de Lafonten, I. Krilov, S. Mixalkov masal va hajviy sheʼrlarini, B. Nushić, N. Dumbadze asarlarini hamda bulgʻor xalq yumori — „Gabrovo latifalari“ni oʻzbek tiliga oʻgirgan.