Golf

Голф (инглизча: голф) — спорт тури. Тўп ва чавгонлар билан очиқ майдонда ўйналади. Бунда 50 мингдан 200 минг м²гача саҳнага эга бўлган паст-баландлиги ўртача табиий майдон (қир-адир, истирохат боғи, ўрмон чеккаси) керак, унда табиий ҳолатида қолдирилган 9 ёки 18 та йўлак-трасса белгиланади; ҳар қайси йўлакнинг уз. 150 дан 470 м гача, кенглиги 30–40 м. Биринчи йўлак бошланишида тахминан 4 м² катталикдаги майдонча тайёрланади, ҳар бир йўлакнинг охирида ўртасида ўйиқ-чуқурча (чуқурлиги 11 см ва диаметри 10 см)ли тахминан 20 м2 келадиган майдонча бўлади. Ўйинчилар жой релефи ва тўпни йўналтириш керак бўлган масофа қандайлигига қараб катталиги, йўғонлиги, учининг шакли бирмунча фарқланадиган, уз. 85—110 см чавгон (клеб)лардан фойдаланадилар. Ўйиннинг мақсади тўпни (вазни 44 г қуйма резинали копток) чавгон билан уриб барча йўлаклардаги чуқурчаларнинг ҳар бирига олиб бориб тушириш. Бу ишни камроқ зарб билан амалга оширган ўйинчи ёки жамоа ғалаба қилади. Голф ўйини ўрта асрда Данияда пайдо бўлган. АҚСҲ, Канада, Буюк Британия, Япония, Австралияда тарқалган. 1900 ва 1904-йилда Олимпиада ўйинлари дастурига киритилган эди. Голфни асосан ўрта ва катта ёшдагилар ўйнайди.

Голф Ўзбекистонда ҳам оммавийлаша бошлади. Бунда 1998-йилда қуриб битказилган Тошкент голф клуби катта аҳамият касб этди. Бу клуб Ўрта Осиё минтақасида биринчи бўлиб халқаро голф мусобақаларини ўтказиш имконини яратди. 2001-йил 20-майда Тошкент голф клубида голф бўйича Ўзбекистоннинг биринчи очиқ чемпионати ўтказилди. Унда Ўзбекистон, АҚСҲ, Германия, Жанубий Корея, Малайзия, Англия, Шотландия, Канада, ЖАР ва бошқа мамлакатлардан 100 га яқин спортчи қатнашди.

Адабиётлар

• ЎзМЕ. Биринчи жилд. Тошкент, 2000-йил