Pachkamar suv ombori

Пачкамар сув омбори — Қашқадарёнинг кам сувли чап ирмоғи — Ғузордарёда барпо этилган йирик гидротехника иншооти. Ғузор тумани марказидан 15 км юқорида жойлашган. Катта Ўра ва Кичик Ўрадарёларидан тўлдирилади. Қурилиш ишлари 1964-йилда бошланиб, 1967-йилда фойдаланишга топширилган, 1968-йил тўлиқ қуриб битказилган. Омборнинг сув юзаси узунлиги 3,9 км, кенглиги 1,8 км. Сув юзаси майдони 12,8 км², энг катта (максимал) чуқурлиги 51м, ўртача чуқурлиги 30 м. Сув омбори дарёнинг мавсумий ва қисман кўп йиллик сув режимини тартибга солади. Тўғоннинг устки узунлиги 593 м, баландлиги 68 м. Сув омборининг ўнг қирғоғида узунлиги 198 м ва максимал баландлиги 12 м бўлган кўтарма дамба қурилган. Омборнинг ўнг соҳилида сув сарфи 30 м³/с бўлган сув чиқаргич қурилган. Сув чиқаргичнинг қуйи қисмига 2 та конуссимон ростлагич ўрнатилган. Тўғоннинг чап томонида сув сарфи 260 м³/с (фавқулодда тошқинларда сув сарфи 480 м³/с) бўлган сув ташлагич — Чап соҳил канали очиқ ҳолда қурилган.

Сув омборининг қурилиши Ғузор туманининг сув таъминотини яхшилашда ва унинг иқтисодиётида муҳим рол ўйнайди, экин майдонларини 15 минг гектарга ошириш имконини берди. Пачкамар сув омборида балиқчилик хўжалиги ташкил этилган.